意外
今次河內之旅發生咗去咗成廿次旅行最嚴重既意外，老婆 PK，話說嗰日去完人類學博物館後，惗住坐巴士去Sofitel Metropole食buffet，點知出意外，因為太遲落車，我先落巴士，老婆跟尾，點知架巴士突然開車，老婆即時碌咗落地，四腳朝天，手肘擦損流晒血，拿拿聲坐埋一邊止咗血同用清水洗，定一定神後隨即截的士番酒店，酒店職員話冇 first aid 用品，唯有番房用有酒精既濕紙巾消毒傷口。擦損咗一拂肉，一日之後嗰傷口仲好嚴重咁，好彩冇感染發炎。
Shopping
自從上次係胡志明市試過越南咖啡後便愛上它，今次去河內其中一個目的就係買多啲越南咖啡番嚟慢慢歎。原本惗住買咖啡豆番嚟自己磨粉(可以keep耐哋，點知河內唔見有 中原咖啡專門店 ，唯有去超級市場買咖啡粉，中原咖啡以味道及價錢由低至高分1至5號及Legendee貓屎咖啡，我哋鍾意4號，雖然Legendee都好好飲，不過貴4號3倍，4號咖啡味濃而且價錢平(80k盾或HK$32/kg)，我哋總共買咗2kg，另外喺Hang Buom street(專賣咖啡)買多兩個咖啡滴漏杯(35k盾)，有興趣可以去嚟間，嗰姐姐好好人。
另外喺Trang Tien Plaza頂樓超市買咗支魚露，超市架上有成二、三十種魚露，全部越南文，都唔知邊支好，唯有揀支全場最貴(一大支都係HK$20)。番到嚟search吓至知真係堅料，嗰樽寫明50度(愈高味愈濃，最高係60度)，每次用1至2湯匙開稀可以有排食。
另外買咗啲零食手信和 Vissan扎肉 ，扎肉既質地跟香港食既完全唔同，好彈牙又有肉味，不過都唔平(越南嚟講)，細細嚿半磅要 >HK$20，最衰唔擠得耐，唔可以買多啲。
交通
係河內我哋主要坐巴士及的士，巴士好平，2k盾(HK$0.8)攪掂，大部份景點都去得到，可以請職員或當地人幫手哎落車，不過小心落車pk。
坐的士都好平，唔塞車行10分鐘車大約HK$10，條街好多的士，最衰係驚上咗架黑車，的士佬會兜路或劏遊客錢，我哋堅持揀大既的士公司穩陣啲，司機穿制服，胡志明市通街都係Vinasun / Mai Linh，河內就唔見Vinasun，穩陣啲有Hanoi Taxi / CP Taxi / Hanoi Tourist，有幾次係條街度等成十鐘先截到我哋想坐既的士。
另外由酒店去機場，如果係繁忙時間，最好係叫酒店call的士一口價，Hanoi PlazaHotel職員話US$15(之前搵既料係US$10-12)，於是我哋自己出去截，點知市中心塞咗一震車，去到機場要>(HK$170)，蝕咗HK$50。
酒店
出發前係agoda book咗2晚 Hanoi Plaza Hotel ，一共HK$435，係陸龍灣番嚟住多晚收US$30，間酒店（應該叫旅館）行去還劍湖只要7-8分鐘，好方便，只是向大街既房較嘈，向內街啲房就較暗，最後揀咗頂樓向大街既房，關露台門開冷氣問題唔大，房間乾淨，有露台，職員nice，如果但求乾淨方便要求唔高，可以考慮。
感想： 整體河內飲飲食食冇胡志明市咁好, 又好少中原咖啡專門店, 唯一推介是寧平陸龍灣, 雖然名氣差下龍灣很多，但風景不比下龍灣差，樸素，沒有下龍灣斬遊客團。
~ 完 ~
留言列表
