去完下龍灣失望而回,另一主要side-trip地方係寧平陸龍灣,好少香港人自由行去,離河內只係2小時車程,大部份旅客喺河內join團1日來回,但網上睇見幾靚,所以住咗1晚,輕輕鬆鬆睇靚景。
朝早8點3喺酒店坐的士去Giap Bai長途車站(15分鐘80k盾)
logistic同Gia Lam去下龍灣差唔多,前幾日坐長途車去下龍灣之後有咗陰影,但又冇其他選擇,唯有頂硬上。8點9坐上架小巴,點知喺車站呆等咗45分鐘先出發,心惗上咗賊船,又唔知要坐幾耐,好在架車冇沿路招攬,行快速公路兩個鐘就到寧平。
個查飛好嘆
落車之後行7、8分鐘搵到我哋想住既旅館Xuan Hoa Hotel。新舊翼兩棟樓隔20步
老板先帶我哋睇2間房,第一間細小小(US$18),第二間超大又光猛,仲有露台湖景,老板話原本US$30,可能閒日冇嘜人,問我哋願意俾幾錢,US$20成交,抵到爛!
然後問老板安排包電單車玩,US$ 16兩架車連司機,去Trang An Cave乘小船+ Hoa Lu + Mua Cave + Tam Coc,包咩唔包咩,老板解釋得一清二楚,同下龍灣d團差天共地。陸龍灣有兩個地方坐小艇, Tam Coc較早開發, join團多數嚟依道,船夫可惡索小費。Trang An新開發,船夫樸素。
然後喺酒店餐廳食完 lunch後1點出發,老板好貼心安排咗一男一女司機俾我哋。15分鐘到Trang An Cave,自己買入場券連船夫(100k盾/人),船夫嬸嬸喺船尾慢慢扒艇,風景好靚好寧靜,沿途遊客不多,最過隱係穿過d山窿,由於離水面好近,成日要烏底身,山窿彎彎曲曲,船夫技術一流。
陸龍灣船夫奇景,一個人扒足3個鐘,換隻腳嚟扒艇,上岸最後俾咗40k盾小費。
之後上番電單車去Hoa Lu,不過冇咩特別,唔夠10分鐘就走人去Mua Cave。
Mua Cave以前冇聽過,但老板猛話好靚好靚。
山腳有個湖,有d似九寨溝
沿S型樓梯行20分鐘上山頂
索晒氣,但風景真係靚到哇哇聲,老板冇介紹錯。可惜上到山頂已經5點,太陽落咗山,部DC相機影d相出嚟同現場差好遠
影完相快快落山,因為我哋成1點先出發,睇完Mua Cave已經6點,冇去到Tam Coc,不過同Trang An 差不多,原本都係順路望吓,唔去都冇失望。
番去酒店坐吓就落去餐廳食韓國燒烤,套餐雞牛各一,好豐富,味道幾好,連兩杯飲品都係180k盾(HK$70),老板仲攞出私家酒請每檯客人飲。
第二朝食完早餐,老板仲幫手叫車站既人喺酒店門口接我哋出去車站塔車番河內。服務真係冇得彈,睇得出老板用心經營間酒店,比起下龍灣好過百倍。
陸龍灣感想: 雖然名氣差下龍灣很多,但風景不比下龍灣差,樸素,沒有下龍灣斬遊客團,又近河內,Xuan Hoa Hotel老板好人,值得推介,如果留多一日仲可以join day tour去埋National Park。
- Nov 25 Thu 2010 14:51
2010北越 - 寧平陸龍灣
全站熱搜
留言列表
發表留言