山寨背包客

喺河內食咗幾餐，整體冇胡志明市咁好味。比較值得推介係Pho Gia Truyenn河粉及Hoa Sua School餐廳

炸魚米線：話說老婆pk之後番去酒店清潔傷口已經1點幾，冇mood去Sofitel Metropole食buffet，冧住去附近Pho Gia Truyenn，行到去先知落咗場，6點至開，可能唔係旅遊區，周圍d食市2點已經收工，唯有是但衝入間店舖食碗炸魚米線(每碗 25k盾/HK$10 頂住先。


Green Tangerine (48 Hàng Bè Street)：再去Green Tangerine食甜品。網上睇到差唔多個個去河內都會去Green Tangerine，但comment一般，食物少少fusion唔係特別吸引，所以只去食甜品。見加小小錢包埋頭盤，我哋唉咗三文魚薯仔沙律及朱古力moose(177 k盾)，另加個雜錦甜品拼盤(123 k盾)，埋單HK$120，甜品拼盤幾新奇，但味道真係非常一般，唔推薦。


Moca Café：再接再勵，去聖若瑟教堂附近既Moca Café食mango cheese cake及Tiramisu，加杯越南咖啡129k盾 (HK$50)，唔算好平，但幾好味，值得一試。對面有幾間外國餐廳(Salsa Tapas、Mediterraneo)，有機會可以試吓。


Pho Gia Truyenn河粉 (49 Bát Đàn Street)：蔡瀾都推介這間，晏晝2點撲空，夜晚7點再嚟，已見幾個當地人排隊，首先係門口手指指點你要既肉，我哋點咗牛坑腩 (30k盾, HK$12)，然後揾位坐低等食。好好味，牛坑腩好冧滑，湯底好味，加多碟油炸鬼 (3k盾)，不過覺得胡志明市食河粉加香草仲好味。如果去河內一定再嚟食。


Bun Cha Dac Kim (1 Hàng Mành)：Hanoi Plaza Hotel行唔使一分鐘，地下係廚房，老板娘問我哋食咩，對住d食物指手劃腳，然後上二樓坐低，一震上一大盤米線、香草及甜甜酸酸的湯，侍應送上兩大碗滿既炭燒豬肉丸及一大碟春捲 (120k, HK$48)，食到嘔都食剩大半碗豬肉丸，可惜！！！其實豬肉丸同春捲都好惦，應該兩人叫一份豬肉丸+春捲就啱啱好。


Sofitel Metropole lunch buffet (15 Ngo Quyen Street)：話說因老婆pk意外食唔到，唯有修改行程，去完寧平陸龍灣後直奔Sofitel既Le Beaulieu，11點半到達未有客人，食物味道不錯，有很多選擇，特別係頭盤，仲有不同種類芝士，最好味係焗蠔及蟹，食咗兩個幾鐘至埋單 (buffet US$28/人 + 橙汁 US$5)。整體食物不錯，但冇太大驚喜，一人成HK$300唔可以話底食，只是不妨一試。














La Vertical法國餐 (19 Ngo Van So Street)：食法國餐唔去Green Tangerine，專登坐的士嚟La Vertical，先經過地下商店及廚房到達2、3樓用餐地方，餐牌有set dinner(餐廳網頁有得睇)，不過我哋散叫。


呢間法國餐廳係法國菜加入亞洲香料元素，所以檯中間放不同香料，先上兩個welcome dish


老婆order的 : 龍蝦pho(最豪既河粉)，牛柳，朱古力蛋糕配雪糕


我的食物 : 頭盤三味(太多, 唔記得食咗<嘜嘢)，燒豬柳配大蝦，Crème brûlée


食咗兩個鐘，2650k盾 (HK$1,000)，唔係話唔好食，不過冇嘜驚喜，可能法國/亞洲香料fusion唔係好啱我哋口味，而且食完個頭盤三味已經飽到飛起。服務方面冇問題，侍應都會上每道菜後解釋食法，唯一扣分係離開時冇主動問使唔使call 的士。相比之下，之前係胡志明市Le Bordeaux食港紙六百幾蚊底好多，服務非常體貼，有機會再到胡志明市一定去食多次。

Hoa Sua School Song Thu Restaurant (28A Ha Hoi)：是專門幫助家庭有狀況的青年，訓練他們擁有一技之長(烹飪或侍應)，提供就業機會。餐廳地點在住宅區小巷內，外面是室外花園，因為行到全身熱晒，所以坐室內有冷氣。餐廳提供越南及西式菜色，點了蟹肉沙律，春捲，焦糖豬排以及一個set，樣樣都好好味，特別係沙律同春捲好新鮮，食得出蟹/蝦味，豬排好滑。連一個甜品及兩杯飲品，埋單440k盾(HK$170)，係越南嚟講唔算平，但食物質素一流，侍應生服務欣勤，少少錢就食到好味越南餐，又幫到青年，一舉兩得。Hoa Sua School其實除Song Thu Restaurant外，還有Café Smile及Baguette&Chocolat，可惜冇機會試。




Highlands Coffee Shop：喺KFC對面間Highlands飲嗰兩次，smoothy 50k盾(HK$20)，咖啡 30k盾 (HK$12)，但係杯咖啡唔得，同中原差好遠，似Starbucks多過越南咖啡，河內好少中原咖啡專門店，胡志明市多好多。