Day 3 : 2010年3月20日
Check-out ~ 飛曼谷 ~ 紅衫軍接機 ~ 24Inn Check-in ~ 午餐Som Tam ~ Siam Paragon ~ 林真香 ~ Central World ~ Big C ~ 晚餐Emporium Food Court
今天中午要飛曼谷, 所以今日改變策略, 先曬太陽同游水, 10點才食早餐當Brunch, 11點check-out後係酒店門口坐的士去機場, 開價800b, 講成700b(超貴), 如果碰到最好同其他人share的士, 要架7人的士都一定有著數
半個鐘到機場, AirAsia有4個counter, 兩個去曼谷兩個去吉隆坡, 好在左邊去曼谷唔使排隊check-in, 好快攪掂, 慢慢吃埋個芒果先入閘
好好彩, 到曼谷又係早到。紅衫軍之旅正式開始, 我唔係講笑, 一出機場就有紅衫軍既人接機。
事緣出發前已知道紅衫軍會係今日摣車遊行, 所以係機場打電話去24Inn問附近有冇塞車, 個Reception好堅定 咁話"No! No! No traffic jam", 於是走上 4樓 離境大堂截的士 (唔使比50b counter, 坐過幾次司機都好老實無兜路, 反而聽好多人去1樓搭的士都俾人呃), 通常我哋只會截d剛落客既的士, 等左一陣, 有個的士司機叫我哋, 即管試下, 他一同睇個地址就話ok上車, 開左一陣車, 佢問我哋識唔識"Richard", 心諗李澤楷真係咁出名, 講多兩講原來佢係話"Red Shirt", 當然知啦！說時遲那時快, 佢係個袋拎d紅背心出嚟,仲有紅頭巾及紅衫軍證, 三扒兩撥穿哂上身, 仲猛照鏡, 我哋先知上咗架紅衫軍的士
變身後都幾型
不過佢好人又好傾, 英文又好,佢變完身之後仲叫我哋唔好驚, 其實我哋完全唔驚 (佢仲驚過我哋, 猛話Don't scare, don't scare), 仲好, 即係佢知紅衫軍遊行路線, 唔怕塞車, 同埋佢都唔會呃我哋做哀紅衫軍個名, 落高架橋到Sukhumvit 有少少塞(算係正常), 坐咗約40分鐘到BTS Phrom Phong站, 車費220b+橋費45b+25b, 因為係路邊落車, 無再同司機影相, 拉住個行李過馬路 24Inn check-in (1500b/晚 + 1000按金, 只收現金)
2/F 非吸煙, 望內街(安靜好多), 望Sukhumvit 對住BTS幾噪但平Ｄ(1300b)
房間雖細但乾淨整齊, 有電視雪櫃即沖飲品, 非常滿意
已經3點幾, 放低行李哪哪聲去食野, 酒店門口行5步(唔係講笑)即到電梯上BTS站, 去Som Tam食地道東北泰菜，3、4點都差不多坐滿, 高峰時間一定要排隊
肥人要注意, 個門口超窄, 都唔知泰國通Roger點入去介紹
食咗木瓜沙律(要求唔辣都有少少辣, 好好味) 炸雞翼 (必食) 豬頸肉(幾好味) 泰式炒麵(一般)
行咗一陣Siam Paragon就到林真香買手信同唱錢, 雖然紅衫軍遊行, 市面跟平常無異
到傍晚行完Central World去Big C終於見到紅衫軍車隊,兩旁不少人拍掌支持
買完野差唔多9點先返Emporium Foodcourt 食晚飯, 去到才記起Emporium 個Foodcourt唔得, 很少攤位又細,求其食碗肉丸河就返酒店。
留言列表
