山寨背包客

Day 2 : 2010年3月19日
酒店hea ~ 巴東Jungceylon ~ Banzaan Fresh Market海鮮大餐 ~ Hotel 繼續hea ~ 晚餐酒店泳池餐廳
第二朝起身出露台望下個海, 即時醒晒

之後落去先用大毛巾霸2張前排沙灘椅, 享180度海景 ,然後慢慢食早餐

Hea到12點, 坐的士出巴東, 都幾貴, 15分鐘收300b。出巴東主要目的唔係shopping (等到去曼谷先血拼)

 

Jungceylon後面既Banzaan Fresh Market海鮮大餐先係我哋既Target , 入面係local人既街市, 有生果, 菜及好多海鮮

二樓有Foodcourt

第一時間上二樓查看有冇攤位可以代煮海鮮, 否則隨時扲住一袋二袋生海鮮回酒店, Foodcourt大多數喺local人, 只有4-5檔開。
呢間有寫"we can cook for you", 而且多local人幫親買客飯 (40-50b/碟), 攤檔有2個女廚, 其中一個通英文, 煮法有炒蒸炸, 但冇BBQ燒烤
 

問過價錢ok後落番去地下挑選海鮮, 龍蝦、大虎蝦、花蟹、東西星班任君選擇, 大部分都標明每kg價錢, 當面秤重, 唔怕俾人呃 (除非個秤做過手腳)。
 

一場嚟到一於食豪d, 買咗隻龍蝦(斤半重 1150b), 2隻蟹(1隻藍腳蟹1隻花蟹 總共1斤 135b), 1斤蜆(60b)。

 

等咗20分鐘, 終於有得食, 炒蜆差不多全部開晒, 好鮮味。超大隻龍蝦, 剩喺個頭都長過隻叉, 仲有好多第一次食既龍蝦子(左下), 不過d肉唔夠爽, 之後稔番起應該食龍蝦公肉爽d
 

兩隻蟹最後登場, 先食花蟹, 幾鮮算多肉ok, 但一食隻藍腳蟹就高低立見, 嘩超鮮, 喺香港好少食到咁鮮甜
 

臨走時順便喺街市買個椰青飲 (25b) 及兩個芒果 (40b) 返酒店食, 行咗一陣Jungceylon及家樂福之後坐tuk tuk (300b)返酒店
 

經過酒店lobby又忍唔住再影下

酒店Vanilla Skybar睇日落一流

另一間餐廳Plum幾高檔, 可以坐私人海景位, 好浪漫, 求婚一流

我哋落泳池游一陣水, 浸住Jacuzzi睇日落

夜晚留喺酒店poolside食dinner, 蝦餅，pizza，腰果炒雞跟飯，兩杯果汁，總共1300b，小貴不過好食過琴晚kamala Sala Thai
 

飯後番房食埋個芒果，好甜好香

Cape Sienna住後感:
環境：一流，全部房望住kamala海灘或海，連個lobby都對住個超開揚海景，天連海海連天，環境好靜，唔似巴東咁嘈雜。
職員：很友善，笑容可加，又唔會sell day tour。
設施：雖然酒店唔喺好大，以resort嚟講有點細，不過酒店以成人客做對象，規定16歲以上，所以唔似其他resort咁嘈咁擠逼，適合夫婦或情侶住。個泳池細，不過通常得2-3個客人游水。前排沙灘椅好讚，落地玻璃望海，不過最好食早餐前霸定位，如果酒店住滿客人都頗逼。
位置：交通喺一大問題，出巴東坐的士15分鐘收300b，都幾貴，假如無揸車又經常出巴東就唔好住
房間：空間充足，露台當然望海，一般設施都有，Samsung LCD TV + HiFi DVD，可以喺counter借DVD睇，check-in時可選擇日用品香味，又有點香熏，假如住Jacuzzi房更讚。
整體：值得推薦，適合靜靜地喺酒店hea，有揸車就更好，出巴東好近。假如淡季可以考慮住Jacuzzi房。